Куды падзеліся берасцейскія выбаршчыкі?
У Брэсце заўважана істотнае скарачэнне колькасці выбаршчыкаў. Як адзначае назіральнік кампаніі “Праваабаронцы за свабодныя выбары” Уладзімір Вялічкін, скарачэнне адбылося па ўсіх акругах горада.
Так, на Брэсцкай-заходняй выбарчай акрузе №1 на мінулых парламенцкіх выбарах 2016 года налічвалася 71005 выбаршчыкаў, а ў 2019 годзе – 68801 (колькасць скарацілася на 2204 выбаршчыка). На Брэсцкай-цэнтральнай выбарчай акрузе №2 – 63319 у 2016 годзе і 57459 у бягучым (скарацілася на 5860 выбаршчыкаў). І па Брэсцкай-усходняй выбарчай акрузе №3 падчас папярэдняй парламенцкай кампаніі было 62517 выбаршчыкаў, а ў 2019 годзе - 60524 (скарацілася на 1993 выбаршчыка).
Агулам па ўсіх акругах Брэста на парламенцкіх выбарах 2019 года змогуць прагаласаваць на 10057 выбаршчыкаў меней, чым было на аналагічных выбарах 2016 года. У працэнтных суадносінах колькасць выбаршчыкаў у Брэсце скарацілася на 5,135%.
Цікава, што калі паглядзець агульную колькасць насельніцтва Брэста за 2016 і 2019 гады, то пабачым зусім іншую тэндэнцыю. Так, на 1 студзеня 2016 года ў абласным цэнтры пражывала 340 100 чалавек, а на 1 студзеня 2019 года ўжо 350 616. То бок за гэтыя тры гады насельніцтва горада вырасла на 10516 чалавек.
Дык калі насельніцтва горада вырасла, то адкуль такое скарачэнне колькасці выбаршчыкаў?