Праваабаронцы за свабодныя выбары

Сёння, 28 кастрычніка, Мінгарсуд разгледзеў скаргу старшыні руху «За Свабоду» Юрыя Губарэвіча на нерэгістрацыю яго ў якасці кандыдата ў дэпутаты Палаты прадстаўнікоў. Гэта была апошняя інстанцыя. Суддзя О. Рымашэўская прыняла рашэнне адмовіць у рэгістрацыі кандыдатам Губарэвіча.

Судовы працэс адсочваў назіральнік кампаніі "Праваабаронцы за свабодныя выбары" Аляксей Лойка.

На пачатку паседжання Юрый Губарэвіч заявіў хадайніцтва аб тым, каб дзве яго скаргі (ён вылучаўся двума спосабамі: зборам подпісаў і ад «Руху за Свабоду») разглядаліся ў двух асобных пасяджэннях. Старшыня Мінгарвыбаркама запярэчыў ў сувязі з тым, што Губарэвіч падаў дзве скаргі на адно рашэнне Мінгарвыбаркама. Яго падтрымала прокурорка Трацякова. Суддзя адмовіла ў задавальненні хадайніцтва. 

Наогул усе заяўленыя Губарэвічам хадайніцтвы судом адхіляліся, а аргументацыя ігнаравалася.

Губарэвіч прасіў перанесці паседжанне, каб ён мог пайсці па адрасах і сабраць доказы, што гэтыя людзі ставілі свой подпіс. Старшыня Мінгарвыбаркама Шаўцоў запярэчыў, яго падтрымала прокурорка. У задавальненні хадайніцтва адмоўлена ў сувязі з тым, што скарга была пададзеная 24 кастрычніка — у Губарэвіча было дастаткова часу сабраць доказы. 

Губарэвіч у судзе казаў, што ў рашэнні АВК не ўтрымлівае інфармацыі аб тым, як сябрамі АВК адбіраліся падпісныя лісты для праверкі.

У рашэнні АВК было ўказана, што 14 подпісаў былі ўзятыя ў доме па вул. Гамарніка, 28. Выбарчая камісія паведаміла, што не паказаны корпус 2, таму подпісы несапраўдныя. Губарэвіч звярнуўся ў ЖКГ, дзе яму далі выпіску, што такога дома — 28 корпус 2 не існуе. Прокурорка заявіла, што гэтая паперка не адпавядае патрабаванням адноснасці і дапушчальнасці доказаў, так як няма ніякага суправаджальнага ліста аб тым якая службовая асоба выдала гэтую даведку. Суддзя падтрымала пракурорку. Такая ж сітуацыя з подпісамі па вуліцы Сурганава. Гэта 50% подпісаў закліканых Савецкім РУУС несапраўднымі. Астатнюю частку подпісаў Губарэвічу фізічна было немагчыма аспрэчыць, бо яму не далі магчымасць азнаёміцца ў Мінгарвыбаркаме з матэрыяламі праверкі міліцыі.

СМС аб тым, што Юрый Губарэвіч можа азнаёміцца з матэрыяламі была дасланая ў пятніцу пасля абеду. Суддзя падчас пасяджэння: "То бо ў вас была субота і нядзеля для азнаямлення". Юрый Губарэвіч: "А хіба суд адкрыты ў выходныя?" Суддзя: "Не, але вам жа даслалі смс-ку ў пятніцу."

Старшыні руху «За Свабоду» Юрыю Губарэвічу было адмоўлена ў задавальненні скаргі на нерэгістрацыю яго ў якасці кандыдата ў дэпутаты на той падставе, што ў яго падпісных лістах было 33,5% несапраўдных подпісаў ад колькасці адабраных для праверкі.

Таксама 28 кастрычніка абскардзіў нерэгістрацыю ў якасці кандыдата Ігар Кібальчыч па Мінскай-Коласаўскай акрузе №106. Яму таксама было адмоўлена ў задавальненні скаргі. Па ягоным подпісам таксама былі пытанні: няправільна паказаныя адрасы, пашпартныя дадзеныя і даты нараджэння.

"Праваабаронцы за свабодныя выбары"

Навіны кампаніі ў фэйсбуку, твітэры і на Тэлеграм-канале