Праваабаронцы за свабодныя выбары

Праваабарончы цэнтр «Вясна» беларускі хельсінкскі камітэт

"Кажа, што мы галоснасцю тут не займаемся". Назіральніку вынеслі два папярэджанні за дзень

Два папярэджанні ў адзін дзень вынеслі назіральніку кампаніі «Праваабаронцы за свабодныя выбары» Аляксею Лойку, піша "Новы Час". Ён назірае на выбарчым участку №390 і з’яўляецца доўгатэрміновым назіральнікам па Мінскай-Заходняй акрузе №102.

loika_lesha_8.jpg
Назіральнікі выбарчага ўчастка №390

У трэці дзень датэрміновага галасавання ўчастковая камісія №390 вынесла яму папярэджанне за фатаграфаванне канцэрту ў калідоры школы. Канцэрты арганізоўваюцца з пачатку датэрміновага галасавання. Фотаздымак быў размешчаны на сайце кампаніі «Праваабаронцы за свабодныя выбары». Аднак назіральнік зрабіў яго ў калідоры школы, а не на тэрыторыі ўчасткаў. А ў першы дзень датэрміновага галасавання Аляксея запрашалі нават з участку паглядзець на гэты канцэрт.

Фотарэпартаж з “містычнай” школы: забарона фотаздымкі, завышаная колькасць выбаршчыкаў, загоны

Менавіта адсюль кампанія “Праваабаронцы за свабодныя выбары” атрымлівае больш за ўсё інфармацыі пра парушэнні выбарчага заканадаўства ад назіральніка кампаніі Аляксея Лойкі. Паглядзім, што там не так.

Увогуле прэтэнзіі да назіральніка сябраў камісіі №390, ды і суседніх №389 і №391, зводзяцца да таго, што Аляксей Лойка апублічвае ўсё, што адбываецца падчас выбараў на ўчастках у мінскай школе №159.

«Сказалі, каб я больш не раздаваў каментароў "сваёй любімай Вясне"», — пракаментаваў сітуацыю "Вясне" Аляксей Лойка пасля пасяджэння, на якім яму вынеслі папярэджанне.

Другое папярэджанне, ужо як доўгатэрміноваму назіральніку, Лойку было вынесена на пасяджэнні вышэйстаячай камісіі — акруговай камісіі па Мінскай-Заходняй акрузе №102.

«Новы Час» наведаў пасяджэнне камісіі ва Адміністрацыі Фрунзенскага раёна Мінска. На ім прысутнічала і старшыня ўчастковай камісіі №391 Іна Богдан. Менавіта яе заявай было ініцыявана гэтае пасяджэнне. 

Самае цікавае тут тое, што Богдан з'яўляецца дырэктаркай школы, дзе працуе старшыня акруговай камісіі Таццяна Забаўская. Атрымліваецца такая ўзаемна-перакрыжаваная падпарадкаванасць.

Іна Богдан напісала пра назіральніка, што ён «12 лістапада ў 19:07 уварваўся ў пакой, дзе размяшчаюцца дзве камісіі, з патрабаваннем сфатаграфаваць пратаколы першага дня датэрміновага назірання. Акрамя гэтага, ён таемна сфатаграфаваў іх, таму што праз некалькі гадзінаў уся інфармацыя была ў інтэрнэце».

Менавіта з гэтых пратаколаў «Праваабаронцы за свабодныя выбары» даведаліся пра завышаную яўку на ўчастку. На тым, дзе прысутнічаў Лойка, у пратаколе быў пазначаны 21 выкарыстаны бюлетэнь, а на суседніх, праз сценку, — у 10 разоў больш.

З фармулёўкай абвінавачвання выступіла намесніца старшыні акруговай камісіі Вольга Рунец. Яна была вельмі шматслоўна ў гэты вечар.

avk_kamisijajpg-kopija.jpg
Справа - старшыня акруговай камісіі па Мінскай-Заходняй акрузе Таццяна Забаўская, у цэнтры - намесніца старшыні Вольга Рунец

«Калі гэты назіральнік так патрабуе ад нас выканання выбарчага заканадаўства, значыць і сам мусіць яго выконваць!» — паўтарала некалькі разоў намесніца старшыні.

Камісія вырашыла, што, нягледзячы на тое, што Лойка з’яўляецца доўгатэрміновым назіральнікам па Мінскай-Заходняй акрузе №102, паўнамоцтваў на фотаздымку на іншых участках, на якіх ён непасрэдна не назірае, не мае.

«Калі захацеў сфатаграфаваць пратакол па выніках дня галасавання — яго права! Але акрэдытацыі назіральніка на ўчастку №391 у яго няма», — разважае Вольга Рунец.

Але і на тым участку, дзе ў яго ёсць акрэдытацыя, Лойка не можа зрабіць фотаздымак, бо гэта забаранілі рабіць усім назіральнікам. Нават ад місіі БДПІЧ АБСЕ.

 «Ён увесь час піша нейкія неабгрунтаваныя скаргі, незразумела чаго вяшчае ў інтэрнэце, дае там процілеглую інфармацыю, дыскрэдытуе камісіі, кажа, што мы галоснасцю тут не займаемся…» — выдала на эмоцыях намесніца старшыні акруговай камісіі па Мінскай-Заходняй акрузе №102. Але яе перапыніў другі сябра камісіі фразай «Ён парушыў, а чаго мы апраўдваемся?»

Старшыня камісіі Таццяна Забаўская спытала ва ўсіх меркаванне пра меры, якія трэба прадпрыняць у адносінах да назіральніка. Адзін з прадстаўнікоў камісіі прапанаваў мінімум — папярэджанне, максімум — пазбаўленне акрэдытацыі. Сябра камісіі, які лічыць, што ў дадзенай сітуацыі камісія не мусіць апраўдвацца, пажартаваў: «расстраляць». Старшыня камісіі здзівілася на прапанову пазбаўлення Лойкі акрэдытацыі. Яна прапанавала вынесці папярэджанне — падтрымалі адзінагалосна.

Старшыня УВК №391 сыходзячы спытала, ці пазбавяць назіральніка акрэдытацыі, калі будзе яшчэ адно папярэджанне. Але старшыня камісіі ёй параіла не забягаць наперад. Адзін з сябраў камісіі звярнуў увагу, што ўжо мала часу, каб пазбаўляць акрэдытацыі. У размове з дырэктаркай школы намесніца старшыні АВК выказала спадзяванне, што Лойка ўсё ж зразумее сітуацыю «і будзе сам выконваць заканадаўства так, як ён гэта патрабуе ад нас».

Назіральнікі патрабуюць выканання выбарчага заканадаўства, але сябры камісій нават і не збіраюцца пачынаць яго выконваць. Пасля закрыцця выбарчага ўчастку №390 назіральнік кампаніі Аляксей Лойка паведаміў зноў пра завышаную яўку. У пратаколе камісіі пазначана, што ў трэці дзень датэрміновага галасавання, 14 лістапада, быў выдадзены 201 бюлетэнь. Па падліках назіральніка на ўчастак прыходзіла 74 выбаршчыкі.

"Сёння на ўчастак прыходзілі галасаваць амаль адны жанчыны: з 74 выбаршчыкаў — 70 жанчын. Прыкладны ўзрост 40-50 гадоў. Вельмі арганізавана галасавалі", — распавядае назіральнік.

Пратакольныя дадзеныя яны паведамілі і назіральнікам місіі БДПІЧ АБСЕ, якая прыязджалі ўвечары на выбарчы ўчастак. Але сфатаграфаваць сам пратакол ім так і не дазволілі.

Мы будзем працягваць сачыць за падзеямі з гэтых участкаў.

Чытаць таксама матэрыялы пра выбарчыя ўчасткі, дзе назірае Аляксей Лойка:

Першы дзень датэрміновага галасавання: яўка завышаецца больш, чым у 10 разоў

На ўчастку, на якім паведамілі пра высокую яўку выбаршчыкаў, забаранілі фота- і відэаздымку

Фотарэпартаж з “містычнай” школы: забарона фотаздымкі, завышаная колькасць выбаршчыкаў, загоны

Другі дзень датэрміновага галасавання: зноў завышаецца колькасць прагаласаваўшых

Папярэджанне назіральніку за... фота канцэрту ў школе


Кампанія “Праваабаронцы за свабодныя выбары” у чарговы раз нагадвае, што выбары – гэта права, а не абавязак, і кожны грамадзянін мусіць самастойна абіраць калі і за каго галасаваць. Калі вы сутыкнуліся з парушэннямі пад час датэрміновага галасавання, калі ласка, тэрмінова паведамляйце назіральнікам: elections2019@spring96.org, Facebook  і Тэлеграм-канал праваабаронцаў.

“Праваабаронцы за свабодныя выбары”.


Навіны кампаніі ў фэйсбукутвітэры і на Тэлеграм-канале


Каментары