Праваабаронцы за свабодныя выбары

Праваабарончы цэнтр «Вясна» беларускі хельсінкскі камітэт

Будучая выбарчая кампанія стане больш інклюзіўнай?

Ілюстрацыйнае фота
Ілюстрацыйнае фота

Эксперты кампаніі "Праваабаронцы за свабодныя выбары" працягваюць аналізаваць новаўвядзенні выбарчай кампаніі-2019. Яны ўжо станоўча адзначылі тое, што згодна з новым заканадаўствам падчас фарміравання выбарчых камісій перастануць улічвацца "палітычныя якасці" вылучэнцаў. Цяпер іх будуць ацэньваць толькі па "дзелавым і асабістым якасцям".

Акрамя гэтага, праваабаронцы таксама станоўча адзначаюць палажэнні Пастановы ЦВК №29, якія прадугледжваюць стварэнне дадатковых умоў для ўдзелу ў выбарах грамадзян з абмежаванымі фізічнымі магчымасцямі пры правядзенні выбараў.

Па словах аналітыкаў кампаніі "Праваабаронцы за свабодныя выбары", клопат ЦВК аб удзеле ў галасаванні людзей з інваліднасцю ўжо адзначаўся ў ходзе правядзення папярэдніх выбараў і станоўча ацэньваўся ў справаздачах назіральнікаў. Да гэтага часу гэта абмяжоўвалася арганізацыяй самастойнага галасавання людзей з аслабленым зрокам і сляпых. Акрамя гэтага, ЦВК паказваў на неабходнасць наяўнасці на участках для галасавання падрыхтаваных валанцёраў для дапамогі людзям з парушэннем рухальнай функцыі.

Цэнтральная камісія прадугледзела і іншыя ініцыятывы па забеспячэнні даступнасці месцаў для галасавання для людзей з інваліднасцю. Напрыклад, памяшканні для галасавання будуць абсталяваны сталамі, якія маюць перагародкі (шырмы) для забеспячэння тайны галасавання інвалідаў-калясачнікаў, а таксама іншых асоб з парушэннем функцый апорна-рухальнага апарата. Гэтыя меры таксама дапамогуць галасаваць тым, хто з-за ўзросту або стану здароўя не могуць запаўняць бюлетэнь стоячы.

Іншыя новаўвядзенні датычацца людзей з парушэннем слыху. Цяпер дзяржаўныя тэлеканалы, адказныя за трансляцыю перадвыбарных выступленняў кандыдатаў у дэпутаты, павінны забяспечыць выступ субтытрамі ці перакладам на мову жэстаў для грамадзян з парушэннем слыху.

Таксама будуць улічаныя магчымасці падбору мясцовымі выканкамамі памяшканняў для правядзення галасавання, размешчаныя пераважна на першых паверхах будынкаў, і, па магчымасці, абсталяваныя элементамі безбар'ернага асяроддзя. У такім жа парадку будуць вызначацца памяшканні для сустрэч кандыдатаў у дэпутаты з выбаршчыкамі і перадвыбарчых сходаў, якія арганізуюцца выбаршчыкамі.

"Праваабаронцы за свабодныя выбары"


Каментары