Неўключэнне прадстаўнікоў у выбаркамы Магілёўскай вобласці абскарджана ў судзе. Вынік нулявы
Як паведамляе mspring.online, на працэсе 9 верасня суддзя Любоў Халадцова прызнала правату прэзідыумаў Магілёўскага абласнога Савета дэпутатаў і Магілёўскага аблвыканкама, якія не ўключылі ніводнага з 14 прадстаўнікоў «Руху за Свабоду» ў склад акруговых і абласной выбарчых камісій (АВК) рэгіёну.
На думку кіраўніцтва апазіцыйнай арганізацыі, падобнае рашэнне магілёўскіх уладаў «парушае правы« Руху за Свабоду» і з’яўляецца неабгрунтаваным». Давесці гэтую думку да суддзі асабіста было няма каму – прадстаўнікі «Руху» на паседжанне не зьявіліся.
Інтарэсы ўладаў прадстаўляў начальнік упраўлення арганізацыйнай работы Магілёўскага аблвыканкама Аляксей Лаўрыненак. Ён заявіў, што скарга грамадскага аб’яднання задавальненню не падлягае, паколькі фарміраванне камісій адбывалася ў адпаведнасці з законам. Яго падтрымала пракурор Алёна Шуплянкова.
Суддзя выслухаўшы пазіцыю ўладаў, пастанавіла ў скарзе «Руху за Свабоду» адмовіць:
– Суд не мае права абмяркоўваць пытанні аб перавагах аднаго кандыдата ў склад камісіі перад другім, паколькі гэта не ўваходзіць у кампетэнцыю суда, – пазначыла ў сваім рашэнні Халадцова.
Суддзя Юлія Трапыніна, якая разглядала скаргу Аб’яднанай грамадзянскай партыі на неўключэнне ў склад камісій 5 сваіх членаў, таксама прызнала рашэнне абласных уладаў па фарміраванні выбаркамаў законным.
Старшыня абласной арганізацыі АГП Уладзімір Шанцаў на судзе заявіў, што яго партыя збіраецца вылучаць мноства кандыдатаў па Магілёўскай вобласці і хаця б таму яго калег варта было б дапусціць у склад АВК:
– Лагічна, калі ў складзе камісій, якія арганізуюць і кантралююць ход выбараў, будуць прадстаўнікі палітычных сілаў, якія прымаюць непасрэдны ўдзел у выбарчым працэсе.
Яму апанавала намесніца кіраўніка адміністрацыі Ленінскага раёна Ірына Раінчык, якая заявіла, што фарміраванне ўсіх выбаркамаў прайшло ў адпаведнасці з законам.
Суддзя Трапыніна падтрымала чыноўніцу, выказаўшы думку, што нароўні з прадстаўнікамі АГП у склад выбарчых камісій не ўвайшлі прадстаўнікі і іншых партый і аб’яднанняў.
"Праваабаронцы за свабодныя выбары".
Навіны кампаніі ў фэйсбуку, твітэры і на Тэлеграм-канале.