Правакацыі падчас пікетаў апазіцыі ў Баранавічах
У Баранавічах пачаліся правакацыі падчас пікетаў апазіцыі, паведамляе “Радыё Рацыя”. Асабліва актыўнічае пажарная частка, начальнік якой, Ігар Хлабукін, таксама збіраецца балатавацца.
- Фота кампаніі "Праваабаронцы за свабодныя выбары"
Напрыклад, падчас пікета вылучэнкі ад Руху “За свабоду!” Таццяны Малашчанкі каля кінатэатра ў цэнтры горада ў час пік быў перакрыты доступ да месца пікета.
Падчас іншага пікета на гэтым жа месцы, калі туды прыязджаў Мікалай Статкевіч, з сірэнамі прыехала 6 пажарных машын і хуткая. Пікет давялося звярнуць.
Акрамя гэтага выкарыстоўваюць правакатараў, якія па чарзе падыходзяць і замінаюць працаваць.
“Былі правакацыі. Першая правакацыя: падышоў, як аказалася пасля, інвалід ІІ групы, пачаў абражаць, Лукашэнку хваліць. Яго пасля міліцыя забрала. Праз некаторы час падышоў як бы “свой”, сказаў, што хоча за бел-чырвона-белы сцяг распісацца. А пасля пачаў абражаць мяне, пытаць, колькі мне плацяць”, - распавяла Таццяна Малашчанка.
Паводле актывістаў, міліцыя рэагуе дзіўна, можна сказаць, абыходзіцца з парушальнікамі "па-братэрскі”.
“Праваабаронцы за свабодныя выбары”.
Навіны кампаніі ў фэйсбуку, твітэры і на Тэлеграм-канале.