Смаргонь: ад 50 да 100 працэнтаў складу камісій у школах – настаўнікі
Назіральнік кампаніі “Праваабаронцы за свабодныя выбары” са Смаргоні Алесь Дзергачоў прааналізаваў склад нядаўна створаных участковых камісій гораду.
Аказваецца, у выбарчых камісіях, якія месцяцца у школах Смаргоні (выбарчыя участкі пад нумарамі 5, 7, 12, 13, 17, 18) ад 50 да амаль 100% сябраў – супрацоўнікі гэтых навучальных устаноў, чыё месца працы “схавана” спосабам дэлегавання ў камісію: праз збор подпісаў, ці праз накіраванні праўладнымі грамадскімі аб’яднаннямі ды дзяржаўнымі прафсаюзамі.
Ну а “абсалютны рэкорд дэмакратыі” Смаргонскі райвыканкам паставіў у школе №5, што ўзначальваецца Раісай Захарыч, якая, дарэчы, адначасова з’яўляецца старшынёй Смаргонскай акруговай выбарчай камісіі. Там месціцца выбарчая камісія таксама пад №5, у складзе якой 14 чалавек, дэлегаваных туды аж пяццю грамадскімі арганізацыямі і групамі грамадзянаў. З іх 12 – настаўнікі гэтай школы, яшчэ адзін сябар – былая настаўніца, якая ўдзельнічае ў складзе камісіі ці не з 2000-х гадоў, а зараз – пенсінерка. Ну а для самавітасці камісіі яе склад “разбаўлены” Таццянай Шчэберака, дэлегаванай групай грамадзян. Інтэрнэт паказаў, што жанчына з такім прозвішчам і ініцыяламі працуе намеснікам старшыні Смаргонскага райвыканкама.
Зразумела, старшынямі амаль усіх названых выбарчых камісій будуць дырэктары ці намеснікі дырэктараў школ.
У такіх варунках прагноз на сумленнасць падліку галасоў на будучых выбарах у Смаргоні вельмі песімістычны.
“Праваабаронцы за свабодныя выбары”.
Навіны кампаніі ў фэйсбуку, твітэры і на Тэлеграм-канале.