Маладзечна: другое папярэджанне за пікеты “Народнай грамады”
Учора, 7 кастрычніка, быў апошні дзень, калі можна было збіраць подпісі за вылучэнне кандыдатаў у дэпутаты. Як паведаміў доўгатэрміновы назіральнік кампаніі “Праваабаронцы за свабодныя выбары” Эдуард Баланчук, 7 кастрычніка акруговая выбарчая камісія Маладзечанскай акругі №72 вынесла папярэджанне ініцыятыўнай групе актывіста “Народнай грамады” Уладзіміра Жахаўца.
Тады на пікет 3 кастрычніка прыйшлі сябры камісіі Славамір Зубрыцкі і Юрый Казановіч. Яны зрабілі фотаздымкі інфармацыйнага стэнда і выступа Мікалая Статкевіча. Але падставай для вынясення папярэджання сталі менавіта матэрыялы, паступіўшыя з Маладзечненскага РАУС. На пікеце, акрамя сябраў АВК №72, прысутнічалі міліцыянты ў цывільным, якія праводзілі відэаздымку.
Гэта ўжо другое папярэджанне Уладзіміру Жахаўцу. Першае было вынесена 3 кастрычніка за пікет, які праводзіўся на дзень раней.
“Пры правядзенні пікета выкарыстоўваўся інфармацыйны стэнд, які змяшчае частку інфармацыі і агітацыйныя матэрыялы, якія не адносяцца да выбараў дэпутатаў Палаты прадстаўнікоў Нацыянальнага сходу”, – растлумачыла АВК №72 прычыны папярэджання ў рашэнні.
Паведамляецца, што ініцыятыўнай групе была зроблена вусная заўвага і растлумачаны нормы выбарчага заканадаўства.
“Праваабаронцы за свабодныя выбары”.
Навіны кампаніі ў фэйсбуку, твітэры і на Тэлеграм-канале