Праваабаронцы за свабодныя выбары

Праваабарончы цэнтр «Вясна» беларускі хельсінкскі камітэт

Як працуе адміністрацыйны рэсурс? Прыйшлі на бацькоўскі сход, а там - сустрэча з праўладным кандыдатам

Наталля Тарасенка. Фотакалаж
Наталля Тарасенка. Фотакалаж

Увечары 13 лістапада ў сярэдняй школе №45 г. Магілёва павінна была адбыцца сустрэча з кандыдатам у дэпутаты па Магілёўскай-Сельскай акрузе №88 Наталляй Тарасенка. Даведацца пра гэта можна было толькі на сайце Магілёўскага райвыканкама, спампаваўшы патрэбны PDF-файл.

У мікрараёне інфармацыі пра сустрэчу з Наталляй Тарасенкай нідзе не было. Як распавёў сайту mspring.online назіральнік Аляксандр Буракоў, у самой школе ён таксама не выявіў аб’яў аб правядзенні сустрэчы з выбаршчыкамі.

Работнікі школы, у тым ліку чальцы адной з участковых камісій, якія размясціліся ў СШ №45, сказалі, што нічога не ведаюць аб правядзенні сустрэчы з Тарасенкай.

Нягледзячы на ​​гэта, у фае школы сабралася каля сотні чалавек. Як аказалася, гэта бацькі вучняў, якіх склікалі на бацькоўскі сход менавіта ў той жа час, у які павінна была адбыцца сустрэча Тарасенкі з выбаршчыкамі.

А 18-й гадзіне яны падняліся ў актавую залу, дзе дырэктар школы Уладзімір Маціеўскі папярэдзіў іх, што перад бацькоўскiм сходам перад імі выступіць кандыдат у дэпутаты парламента.

Ён адзначыў, што сам з’яўляецца старшынёй участковай выбарчай камісіі, але ў дадзены момант выступае менавіта як дырэктар установы, які прадаставіў Наталлі Тарасенке час і памяшканне пад сустрэчу з выбаршчыкамі.

Шкада толькі, што самі выбаршчыкі, мабыць, да апошняга не ведалі, куды ж яны прыйшлі.

Пасля дваццаціхвіліннага выступу даверанай асобы Наталлі Тарасенкі і самой кандыдаткі, сустрэча з выбаршчыкамі скончылася і пачаўся бацькоўскі сход: дырэктар школы запрасіў на сцэну супрацоўніка МНС.

Наталля Тарасенка – галоўны праўладны кандыдат на месца дэпутата Палаты прадстаўнікоў. На дадзены момант займае пасаду начальніцы аддзела адукацыі Магілёўскага райвыканкама.

“Праваабаронцы за свабодныя выбары”


Навіны кампаніі ў фэйсбукутвітэры і на Тэлеграм-канале


Каментары