Назіральнік просіць пракуратуру правесці праверку па даступнасці выбарчага ўчастка

15.11.2019

Мы зноў вяртаемся да сярэдняй школы №159. На гэты раз звернем увагу на тое, што ўчасткі для галасавання, якія размешчаны там — №389, №390 і №391, па сутнасці не абсталяваны для інвалідаў-калясачнікаў.

Па-першае, першыя дзве лесвіцы з вуліцы Адзінцова, якія вядуць да парога не абсталяваны прыстасаваннямі ў выглядзе пандуса наогул.

Па-другое, на правай частцы лесвіцы, якая вядзе непасрэдна да парога школы, то сам пандус пачынаецца задоўга да таго, як пачынаюцца парэнчы, што робіць амаль немагчымай задачу для інваліда-вазочніка ўзлезці на парог школы без чыёй-небудзь дапамогі.

«Я пытаўся ў школе, можа ў іх ёсць нейкі адмысловы ўваход, асобны. Мне сказалі, што ўсе ўваходы з'яўляюцца аварыйнымі і зачыненыя на ключ. Увайсці ў школу можна толькі праз цэнтральны ўваход. Па сутнасці, гэта парушэнне артыкула 29 Канвенцыі аб правах інвалідаў.

Больш за тое, калі інваліду-вазочніку неабходна звяртацца да чыёй-небудзь дапамогі, то гэта можна расцэньваць як прыніжаючае яго годнасць абыходжанне», — каментуе сітуацыю назіральнік «Праваабаронцы за свабодныя выбары» Аляксей Лойка.

Назіральнік накіраваў скаргу на адсутнасць безбар'ернага асяроддзя для інвалідаў-калясачнікаў на ўчастку для галасавання №390 у пракуратуру Фрунзенскага раёна горада Мінска. Ён просіць правесці там пракурорскую праверку па даступнасці для інвалідаў-калясачнікаў, а таксама прыняць меры пракурорскага рэагавання па ліквідацыі перашкодаў у ажыццяўленні інвалідамі-калясачнікамі свайго пасіўнага выбарчага права — права свабодна ўдзельнічаць у галасаванні (арт.65 Канстытуцыі Рэспублікі Беларусь).

«Гэтая сітуацыя сведчыць аб немагчымасці рэалізаваць інваліду-вазочніку сваё права на кіраванне справамі грамадства. Таксама гэта стварае перадумовы, калі інвалід-калясачнік будзе адчуваць прыніжэнне ад бяссілля і немагчымасці самастойна трапіць на ўчастак для галасавання», — адзначае назіральнік.