Апошні дзень датэрміновага галасавання. "Загоны" працягваюцца
Кампанія "Праваабаронцы за свабодныя выбары" працягвае збіраць інфармацыю пра прымус студэнтаў і работнікаў дзяржаўных прадпрыемстваў да датэрміновага галасавання.
Полацк
У Полацкім дзяржаўным універсітэце студэнтаў першых і другіх курсаў куратары масава прымушалі галасаваць датэрмінова. У прыватнасці, такая інфармацыя прыйшла з фінансава-эканамічнага факультэта. Прозвішча аднаго з куратараў - Іванковіч.
Мінск
З гістфака БДУ паведамляюць, што напярэдадні выбараў усіх студэнтаў збіралі і куратары ім казалі, што трэба абавязкова прагаласаваць, бо так патрабуе закон і гэта трэба для грамадскай карысці. Падчас датэрміновага галасавання куратары асобна збіралі студэнтаў, якія жывуць у інтэрнатах і пад пагрозай незасялення у інтэрнат на наступны навучальны год прымушалі галасаваць. Падобная інфармацыя прыходзіць і з факультэта філасофіі і сацыяльных навук. Інфармацыя атрымана назіральнікамі ад студэнтаў дадзеных вузаў.
Назіральніца паведамляе з участку №296 99-й выбарчай акругі, які месціцца ў інтэрнаце БДУ № 10: "Сёння аж некалькі выпадкаў. Спачатку напалоханая дзяўчына на ўчастку адказала на пытанне "які інтэрнат?" фразай, што ёй сказалі ісці галасаваць. Потым іншыя дзяўчыны прыйшлі без дакументаў, іх завярнулі, і яны сказалі "а нас на зборы не папярэдзілі". Таксама на выхадзе з інтэрнату камендантка спыніла хлопцаў з сумкамі і сказала, што ім трэба было прагаласаваць і што яна не хоча іх выпускаць, таму што яны ж ёй абяцалі. Пры гэтым камендантка азіралася на мяне. Я падышла потым да хлопцаў, яны сказалі, што іх просяць некалькі дзён, каб яны прагаласавалі, але імя жанчыны не ўспомнілі".
«Галоўнае — выбралі прэзідэнта». Чаму студэнты галасуюць датэрмінова
Магілёў
Паведамляе назіральнік Барыс Бухель: На ўчастку №59 Магілёўскай-Прамысловай акругі №87 тыя, хто ідзе галасаваць па загадзе, сапраўды не ведаюць, што рабіць з бюлетэнямі. Большасць прагаласаваўшых студэнтаў спрабавалі аддаць іх сябрам камісій. А адзін студэнт нават пакінуў у кабіне для галасавання і быў трохі засмучаны, калі яму сказалі ўкінуць яго ў скрыню.
Гродна
Назіральнік Ігар Дзьячкоў, які назірае на ўчастку № 11 Гарадзенскай-Цэнтральнай акругі № 51, увесь дзень выслухоўваў скаргі студэнтаў, якія прыходзілі галасаваць датэрмінова. Гэты ўчастак для галасавання знаходзіцца у будынку Гарадзенскага дзяржаўнага універсітэту імя Янкі Купалы. Студэнты наракаюць, што ім настойліва прапаноўваюць прагаласаваць іх куратары. Студэнты баяцца, што калі не выканаюць такіх рэкамендацый, то ў іх будуць праблемы на вучобе.
Баранавічы
Салдаты чакаюць заканчэння абеду, каб датэрмінова прагаласаваць на ўчастку №25 Баранавіцкай-Усходняй акругі №6.
Крэатыў і дзіўныя пагрозы. Другі дзень датэрміновага галасавання
Датэрміновае галасаванне стартуе з "загонаў". Дадавайце свае гісторыі
"Усё ідзе па плане". Трэці дзень датэрміновага галасавання
Кампанія “Праваабаронцы за свабодныя выбары” у чарговы раз нагадвае, што выбары – гэта права, а не абавязак, і кожны грамадзянін мусіць самастойна абіраць калі і за каго галасаваць. Калі вы сутыкнуліся з парушэннямі пад час датэрміновага галасавання, калі ласка, тэрмінова паведамляйце назіральнікам: elections2019@spring96.org, Facebook і Тэлеграм-канал праваабаронцаў.